Муҳрим якшанба кунлари тарих учун яхши нарсаларни ёзади. Ўтган ёмон замонда номи очиқланмаган, лекин ҳозир анча машҳур блогерлардан бири "Муҳрим ҳақида" деб номланган пост ёзганди ва унда айтилгандики, Муҳрим маладес, чунки у журналист ва у шунинг учун доим савол қўяди. Хўш, Муҳрим яна савол қўяяпти: Ўзбекистон Республикасининг биринчи аёл элчиси Гулнора Каримовами ёки ўтган куни Исроил элчиси этиб тайинланган Феруза Юлдашевами? Тарих учун ҳам ва умуман элчиларни тайинлаш функциясига эга Сенат ҳам буни ўзи учун аниқлаштириб олиши керак. Гар масала аниқлаштириш ҳақида кетар экан, биз тарихимиз учун ҳам ҳадеб ўзгартиравермай ва қайта ёзавермай, аниқлаштириб олишимиз керак: Ўзбекистон мустақиллигини қачондан бошлаб санаган маъқул? 1990 йил 20 июнда қабул қилинган ва lex.uz базасидан ўчириб юборилган Мустақиллик декларациясиданми? Ё Кейинчалик Мустақиллик декларацияси асосида яралган «Ўзбекистон Республикасининг Давлат мустақиллиги асослари тўғрисида»ги қонун қабул қилинган 1991 йил 31 август санасиданми? Масалан, грузинлар ўзининг мустақиллигини 1918 йилдаги Грузия Демократик Республикаси ташкил топган кундан санайди, озарбойжонлар ҳам шундай: Озарбойжон Республикасини 1918 йилда пайдо бўлган Озарбойжон Демократик Республикасининг давомчиси ҳисоблайди.