Давлат раҳбари эълон қилган мораторийни бузиш давом этадими? Давлат раҳбарининг фармони билан давлат иштирокидаги корхоналарни ташкил этишга мораторий жорий қилинганига қарамай, давлат корхоналарини тузиш давом этаётганига эътибор қаратгандик. Ачинарлиси, мораторийни унутган ҳолда янги давлат корхоналарини ташкил этиш таклифлари норматив ҳужжатларга ҳам кириб кетмоқда. Ҳукумат қарори билан, 2025 йил якунига қадар Энергия самарадорлиги агентлиги ҳузурида UzESCO МЧЖ компаниясини тузиш таклиф этилмоқда. Шунингдек, Агентликка хорижий экспертлар ва консалтинг компанияларини ёллаш учун 30 млрд.сўм ажратилмоқда. Қарор билан умумий қиймати 1,2 трлн.сўмдан ортиқ "энергия самарадорликни ошириш" лойиҳаларининг параметрлари тасдиқланган.