Яна шимолдан ишора: Россия Ўзбекистонда 2 ГВт қувватли катта АЭС ва 110 МВт қувватли кичик станция қуради Бу сафар шимолликларнинг ҳукумат раиси ўринбосари Новак Петербург форумида изҳори дил қилган: “Бугун [АЭС қурилиши] нинг аниқ иқтисодий параметрлари муҳокама қилинмоқда. Бу 1000 МВт қувватга эга иккита [катта] энергоблок ва 55 МВт қувватга эга иккита [кичик] блок бўлади. Биринчи марта Ўзбекистонда кичик қувватли атом станциясини (ҳали ҳеч жойда синовдан ўтмаганини мана тан олишди, таъкид бизники) амалга оширамиз”. Spot'нинг ёзишича, Александр Новак бош вазир ўринбосари Жамшид Хўжаевга юзланиб, Ўзбекистон атом энергетикаси соҳасидаги лойиҳаларни амалга ошириш учун ҳамкор сифатида Россияни танлагани учун миннатдорлик билдирган. Лойиҳанинг камида 10 карра қимматлашишишга олиб келадиган жиддий ўзгаришларга нима туртки бўлгани ҳақида бирон бир маълумот берилмаган. Энг қизиғи, бутун сиёсий, иқтисодий, ижтимоий ва экологик юки ва оқибатлари ўзбек халқи бўйнига тушадиган лойиҳадаги ғалати ўзгаришлар ҳақида ўзбек расмийлари яна сукут сақлашмоқда.