Остонада иккинчи тўлқин Кейинги кунларда қўшни Қозоғистонда коронавирус эпидемияси билан боғлиқ вазият яна кескинлашган. Пойтахт Нурсултон (Остона) ва қўшни Чимкентда тиббиёт тизими янги касалларни қабул қилиш ва хизмат кўрсатишда катта қийинчиликларни бошдан кечирмоқда. Хабарларга кўра, касалхоналар беморлар билан тўлиб тошиб кетган ва янги шикастланганларни қабул қилиш имконияти қолмаган. Шу сабабли янги беморларнинг касалхонага етиб бормай, жони узилиши ҳолатлари ҳам кўпайган. Айни соатларда мамлакат бўйича жами 8 мингга яқин бемор касалхоналарда қолмоқда. Демак, мамлакат тиббиётининг бир вақтда вирусга чалинганларни қабул қилиш имкониятлари шу билан чекланган. Бундан буёғига карантин чораларини енгиллаштириш ва лозим бўлса қайта кучайтиришда энг эътиборга олиниши лозим жиҳат бу касалхоналар ва тиббиёт тизимининг имкониятлари. Мамлакат тиббиёти масалан, шартли кунлик 500 янги касални касалхоналарга етказа оладими, бир вақтнинг ўзида 7-8 минг касални даволаш имкониятлари борми? Шифокор ва ҳамширалар етарлими? Эпидемиологик тенденция ва трендлар борасида қўшниларимиздан 7-10 кун ортдамиз. Бу бизга кўп хатоларни такрорламаслик учун нисбий афзаллик беради. Қўшниларимиздаги аҳволга қараб бизда олдиндан тайёр бўлишга, тегишли чоралар кўришга имкониятлар бор.