Парковкага айланган кўчалар очиладими? Бугунги йиғилишда Давлат раҳбари Вазирлик ва идоралар ходимлари аҳолига ноқулайлик яратиб, “парковка” қилиб олган ҳудудларда фото ва видео камералар ўрнатиб, жазо муқаррарлигини таъминлаш вазифасини қўйган. Шунингдек, давлат хизматчилари жамоат транспортида юриш бўйича намуна бўлиши кераклиги эслатилган. Пойтахт қоқ марказидаги Бухоро, Нуронийлар, Истиқлол, Буюк Турон, Якуб Колас, Шевченко кўчаларининг қисмлари деярли ҳаракатланиш чекланган парковкага айланиб қолган. Мазкур кўчаларда вазирлик, турли марказий идоралар жойлашган ва асосан давлат хизматчилари учун парковка вазифасини бажариб келади. Умид шуки, энди бу кўчалар очилади ва ўзининг аслиятига, кўча функциясига қайта бошлайди.