Ҳозирча фоизлар қимматлашишдан тўхтагани йўқ Марказий банк микроқарзлар ва автокредитларнинг банклар қирқимида ўртача ставкаларини эълон қила бошлагач. иккинчи ҳафта ўтиб, ҳозирча энг юқори ставкаларнинг пасайиши ва ўртачага қараб интилиши ҳодисаси кузатилгани йўқ. Охирги 2 ҳафтада энг юқори ставка микроқарзлар бўйича 40,0%дан 40,8%гача, автокредитлар бўйича эса 29,0%дан 29,1%гача қимматлаган. Умуман олганда, банкларда ставкаларнинг ошиши тўхтамаган, Микроқарзлар бўйича ўртача ставка 34,9%дан 35,4%га, автокредитлар бўйича 24,1%дан 24,3%гача кўтарилган. Албатта, 2 ҳафта истеъмолчиларга бозор ҳақида солиштирма ахборотга эга бўлган ҳолда қарорларини ўзгартириш ёки банкларнинг тегишли реакцияси учун жуда кам муддат. Лекин чакана кредит маҳсулотларининг ўхшашини ўхшаши, мосини мос билан солиштириш масаласига эътибор қаратилмаса бўлмайди. Хусусан, гўёки паст фоизли, лекин қаттиқ гаров ёки иш ҳақи лойиҳасидаги иштирок талаб қилинадиган микроқарзлар билан гаровсиз микроқарзларни, бирламчи бозордаги, фоизининг бир қисми сотувчидан олинадиган автокредитлар билан, иккиламчи бозордаги, комиссионерлар иштирокидаги автокредитларни бир қаторда солиштириш истеъмолчига ёрдам бермайди, қайтанга чалкаштиради.