25 дақиқа: Фермерларга солиқларни каррасига оширадиган "дала чети қонуни" қабул қилинди Қонунчилик палатаси депутатлари дала четига экин экилмаганлик учун солиқларни оширишга оид қонун лойиҳасини иккинчи ва учинчи ўқишда, деярли қаршиликсиз тасдиқлаб юборишди. Бу жараёнга жами 25 дақиқа кетди (40 минутдан 1 соат 5 минутгача оралиқда). Биринчи ўқишдан кейин киритилган ўзгаришлар катта эмас. Хусусан, сўзчиларга кўра, дала четига экин экмаганлик учун 3 карра солиқ ердан фойдаланувчиларга, яъни фермерларга, жарима эса субижарачиларга қўлланилади. Оширилган солиқ бутун ер майдонига эмас, айнан экин экилмаган майдонга қўлланилиши таъкидланди (ҳар доимгидек, ўзгаришларни тўлиқ солиштириш учун қонуннинг 1- ўқишдаги матни ва кейинги ўқишлардаги матни очиқ эмас). Депутатлар шунингдек, 2- ва 3- ўқишда 2026 йил 1 июлга қадар тадбиркорлик субъектларига нисбатан янги турдаги жавобгарлик ва жазо чораларини жорий этишга уч йиллик мораторий (ПФ-27) инобатга олинганини таъкидлашди. Лекин Президентнинг бошқа, 2028 йил 1 январга қадар кичик ва ўрта бизнес субъектлари зиммасига янги мажбуриятлар юклатилишини назарда тутадиган норматив-ҳуқуқий ҳужжатларни қабул қилишга оид мораторийси (ПФ-50) ҳатто эсланмади. Умид шуки, сенаторлар қонунни маъқулламай, ортга қайтаришади.