Евроиттифоқ шимолликлар нефти учун потолок нархни 47,6 долларгача туширди, Ўзбекистонда бензин яна қимматлайдими? Кеча Евроиттифоқ Россиянинг Украинага босқинига қарши қаратилган санкцияларнинг 18- пакетини жорий қилди. Санкцияларнинг навбатдаги пакети анча жиддий ва кенг қамровли бўлиб, жазо чоралари танкерлардан тортиб банкларгача, пропагандачилардан тортиб Россияга ёрдам бераётган Хитой компанияларигача бўлган узун рўйхатни ўз ичига олади. Лекин асосий зарба бу шимолликлар нефти учун нарх потологининг 60 доллардан 47,6 долларгача туширилгани бўлди. Чунки ҳар қандай адекват одам тушунмоқдаки, уруш оловини нафақат чирик империя орзулари, нефть ва газдан тушаётган триллионлар алангалатмоқда, шимолликларда уруш учун пул бор экан, босқинчилик сиёсатини давом эттираверади (нафақат Украинага нисбатан). Энди шимолликлар нефть нархи потолигининг пасайишидан Ўзбекистон ютадими деган саволга ижобий жавоб бериш қийин. Ўтган сафар 2022 йил охирида потолок 60 доллар этиб белгиланганидан усталик билан фойдаланган, улкан дисконт билан манфаат топган давлатлар бу Ҳиндистон ва Хитой бўлди. Ўзбекистон эмас. Қайтанга уруш бошлангач, Ўзбекистонинг шимолга ёқилғи импорти қарамлиги сунъий равишда оширилди (уруш бошлангандан буён нефть ва нефть маҳсулотлари импорти 2,3 карра ошган). Шимолга қарамлик нафақат ошди, глобал бозорда нарх қулаётганига қарамай, Ўзбекистонда бензин нархи тинимсиз ошишда давом этмоқда. Шунақа тасаввур уйғонадики, дисконт талаб қилиш ўрнига, санкциялар ортидан шимолликлар йўқотишларини бизнинг оғасевар монополистларимиз ва бир оёғи шимолдаги олигархлар ўзбекистонлик истеъмолчилар ҳисобидан қоплаб бераётгандек ёки келишиб олиб, биргаликда талашаётгандек. Шу маънода нефть учун потолок нарх 47,6 долларгача пасайгани билан, Ўзбекистонга ижобий таъсир қилишига катта умид қилмаслик керак. Кунимиз энергокинначиларга қолгани инобатга олинса, қўрқаманки, устига янги ўлпонлар миниб, бензин нархи яна ошади.