Давлат бюджети 2025 йилда биринчи марта ойлик плюсга чиққан Июль ойининг дастлабки 21 кунида Давлат бюджетининг даромадлари 23,6 трлн.сўмни, харажатлари эса 22,5 трлн.сўмни ташкил этган ва 2025 йил мавсумида биринчи марта ой ичида 1,1 трлн.сўмлик ижобий фарқ пайдо бўлган. Эътиборлиси, Давлат бюджетининг ойлик плюсга чиқиши 1 июлдан пенсия ва нафақалар оширилиши фонида юз берган. Яъни ой бошидан харажатлар ошганига қарамай, даромадлар ўтган ойдан кўра тезроқ ўсмоқда ва бунда давлат бюджети барқарорлиги таъминланган. Эҳтимолки, бунда энергетикага субсидиялар ажратилиши камайгани ҳолати ҳам таъсир ўтказган. Бюджет консолидацияси Ўзбекистон учун макроиқтисодий барқарорликни таъминлашда ҳаддан ташқари муҳим аҳамиятга эга. Давлат бюджетининг ойлик плюсга чиқиши маълумотлар турлича кўринишда (чала, қисман) очиқланган 2023 йилда умуман кузатилмаган, 2024 йилда эса фақат октябрь ойига келибгина рўй берганди.