Валюта курси ҳақида Миркомил Холбоев ёзмоқда: “(Реал) валюта курси қисқа муддатли шоклар фонида ўзининг узоқ муддатли трендидан узоқлашиб кетмаслиги керак. Агар шундай бўлса бу валюта курсига сезувчан соҳаларнинг ташқи бозорда рақобатбардошлигига зарар етказади. Қисқа муддатли нарх ўсишидан келган қўшимча даромадлар эса иқтисодиётга қайта қуйилиши эмас албатта жамғарилиши керак. Ҳозирги шарт шароитлар сўмнинг мустаҳкамланишига замин яратмоқда. Реал валюта курси эса агар адашмаётган бўлсам июнь ойидан буён мустаҳкамланмоқда. Ундан олдинги ойларда эса рублнинг юқори мустаҳкамланиши фонида реал валюта курси ҳам қадрсизланган. Умуман олганда, ХВЖ охирги ҳисоботидан ташқари олдинги ҳисоботларининг  аксариятида реал валюта курсининг фундаментал даражасидан юқорилигини таъкидлаб келган. Хусусан, 2024 йилги ҳисоботида реал валюта курси ўзининг узоқ муддатли трендидан 10 фоиз бандга юқорилиги ҳамда сўм фундаментал даражасидан мустаҳкам шаклланаётганлиги таъкидланган.   2025 йилги ҳисоботда эса реал курснинг узоқ муддатли трендида эканлиги келтирилган. Лекин бу ҳолатга рублнинг кескин мустаҳкамланиши фонида  феврал-май ойларида реал курснинг қадрсизланганлиги таъсир ўтказган бўлиши мумкин. Лекин июн ойидан реал курс катта эҳтимол ўзининг трендидан яна оғишни бошлаган (яъни мустаҳкамланмоқда).  Умуман олганда, ҳозирги шарт шароитларда қимматбаҳо металлардан келаётган даромадлар захираларга йўналтирилиши керак. Лекин бу Марказий банкнинг олтин ҳисобига сўм чиқариши ҳамда стерилизацияни тўлиқ амалга оширмаслиги шаклида эмас балки ўша ортиқча даромадларнинг иқтисодиётдан тўлиқ чиқиб кетиши кўринишида бўлиши керак керак”.