"Жиянчилик" Римда узоқ йиллик дўстим Жулионинг уйида меҳмон бўлдим. Жулио билан Кембрижда бир вақтда аспирантлик қилиб, дўстлашиб қолганмиз, бир йилча Токиода ҳам бир вақтда ишлаганмиз. Британия ва Италиянинг етакчи университетларида ишлаб, Жулио энди АҚШнинг Ҳаваи университетига кетиш арафасида. Кечқурунги овқатдан кейин Жулио ва унинг ота-онаси билан узун суҳбатлар қурдик. Суҳбат давомида Жулионинг отаси мен билан инглизчада сўзлашиб, ўғли билан қисқача италянча сўзлар алмашиб турди. Бир-икки марта инглизча сўз эсига келмай қолганида, ўғлидан сўради. Инглизча сўзлар орасига италянча қўшиб гапирганида, Жулио мен учун инглизча таржимасини қистириб турди. Отаси инглизчасини эслай олмай, италянчада айтган шундай сўзлардан бири "nepote" сўзи бўлди. "Nepote"нинг таржимас "жиян" эканини билмасдим, аммо ҳаёлимга биринчи келган сўз инглизча, кейин бошқа тилларга ҳам кўчган "nepotism" бўлди. Непотизмнинг маъносини яхши тушунсамда ("амалдорлар ҳукуматни суиистеъмол қилиб, қариндошларига иш ва бошқа имтиёзлар бериши"), унинг ўзагида айнан "жиян" сўзи борлигини, унинг таржимаси айнан "жиянчилик" эканини билмаган эканман. #ИнглизТили #Италия @profsherzod