Ўзбекнефтегаз эъжоди олдида Оруэлл чангаллаб қолади Монополист Ўзбекнефтегаз АИ-92 бензиннинг 1 тоннаси бошланғич нархи биринчи босқичда 12 млн 881 минг сўмдан 12 млн 628 минг сўмга туширилганини эълон қилмоқда. Зийрак бўлмаган ўқувчи бунақа хабарларга дарров лаққа тушади, зийрак ўқувчини қўя туринг, кап-катта нашрлар монополист релизи қандай бўлса, шундайлигича кўчириб боса бошлайди. Гап шундаки, Ўзбекнефтегаз биржага чиқарилаётган АИ-92 бензин нархини туширмади, компаниянинг аввалги хабари билан солиштирилса, бензин нархини оширди. Қанақасига дейсизми? 2024 йил 18 октябрь куни Ўзбекнефтегаз АИ-92 бензини 11 538,4 минг сўмдан сотилиши эълон қилинган. Мана 2024 йил 22 октябрдаги компания расмий релизи. Ўтган 9 ойда монополист биржага чиқарилаётган 92 бензин нархи ўзгаргани борасида бошқа маълумот бермаган. Бошқача айтганда, Ўзбекнефтегаз АИ-92 бензин нархини компания ўзи эълон қилган расмий хабарларга таянсак, 11 538,4 минг сўмдан 12 628 минг сўмгача, яъни 9,4%га ошираяпти. Маълумот учун 2024 йил октябрдан 2025 йил августгача даврда брент типидаги нефть нархи ўртача 82 доллардан 67 долларгача пасайган. Ўтган ҳафта давомида биржада 92 бензин нархлари аввалги рекордларни янгилаб, тоннасига 13 066,4 минг сўмга чиққан. Яъни охирги кунларда биржада 92 бензин арзонлашиш ўрнига, янги рекордларни ураяпти. Ўзбекнефтегаз Оруэллни уялтириб қизартирадиган чўпчакларни тўқиши биринчи марта эмас. Ўтган йил охирида олий даражадаги презентацияда ҳам тинимсиз тушиб бораётган газ қазиб олишни оширилаётгандек намоён этишганди. Ўзи ҳадеб Оруэллга ҳавола қилаверишимиз бечора Оруэллга нисбатан адолатсизлик бўлади, энергошогирдлар Оруэллни ўқимаган, бунақа антиқа усулларни ҳурматли энергоустозлардан олган, ўрганган ва тадбиқ этган ҳам бўлиши мумкин-ку.