Каримовнинг бажарилмаган ваъдасидан 15 йил ўтиб, ўртача маош 500 долларга етмоқда Ўзбекистонликлар йил охиригача ўртача 500 АҚШ долларидан маош олади, деб ваъда қилган эди президент Ислом Каримов 2010 йил 31 август куни Мустақиллик байрами тантаналари пайтида сўзлаган нутқида. Лекин 2010 йилдаям, 2011 йилдаям, эски эпоханинг жисмоний интиҳоси юз берган — 2016 йилдаям бу ваъда бажарилмаган. Ҳатто эркин конвертирланмайдиган ва бозор курсидан 2 каррагача фарқланадиган расмий курс бўйича ҳам. Орадан нақ 15 йил ўтиб, 2025 йил 3- чораги якунида, хусусан, энди эркин конвертация ҳуқуқини қўлга киритган ўзбек сўми АҚШ долларига нисбатан ҳайратланарли мустаҳкамланиши ҳисобига (1 доллар 12 067,76 сўм), Ўзбекистонда ўртача маош 500 долларга етмоқда, деб ишонч билан айтса бўлади. Ҳа, бунинг учун, 2025 йил 3- чоракда ўртача ойлик номинал иш ҳақи 6 033 880 сўмдан кам бўлмаслиги ва расмий статистикани кутишимиз керак. Лекин 2025 йил 2- чоракда ўртача ойлик номинал иш ҳақи 5 982,3 минг сўмни ташкил этгани, август ойида маошларнинг 10%лик индексацияси амалга оширилгани (ўтган йилдагидан бир ой аввал) ҳисобга олинса, биз кутаётган ўртача 500 долларлик маош сал кўпроқ ҳам чиқиши мумкин. Шунингдек, ўзбек сўмининг охирги 4 ойда мустаҳкамланиши ҳисобига жон бошига ЯИМ йил якуни билан 3 500 долларга етиши ва ҳатто ошишини ҳам прогноз қилса бўлади. Дарвоқе, жон бошига ЯИМнинг ўсиши борасида 3 йилу 9 ой аввал анча оптимист бўлган эканман, натижалар эса янада оптимистроқ чиқмоқда.