Импортга сунъий ва протекционистик тўсиқлар олиб ташланса, деб тушундим Беҳзод Ҳошимов эҳтимолки, сўм атипик мустаҳкамланаётганини инобатга олиб, "валюта бозорини эркинлаштириш учун яхши маврид" деб ёзмоқда. Валюта бозоримиз 2017 йил сентябрдан буён эркин (капитал ҳаракатини ҳисобга олмаса, капитал олиб чиқиб кетишнинг 146 усули мавжудлиги инобатга олинса, бу чеклов ҳам эмас ўзи). Шундан тушундимки, Беҳзодбек балки сўм курсини тўлиқ ифода этилмаётганини импорт чекловларига боғламоқда. Ростанам, охирги 2 йилда ўзи бусиз ҳам аждарҳо божлар устига нобож тўсиқлар киритилди, бир неча бор гувоҳи бўлдикки, оғзаки топшириқлар билан ҳам бутун бошли соҳаларда ўнлаб миллион долларлик импорт чеклаб қўйилмоқда. Биргина "2-3 кун қонуни" ва жисмоний шахслар учун товарларни божсиз олиб кириш нормалари 2 карра (2 минг доллардан 1 минг долларгача), халқаро курьерлик жўнатмалари орқали етказиб бериладиган товарлар учун лимит 5 карра (1 минг доллардан 200 долларгача) қисқариши ўзи қанча импортни чеклади (чеканка қилинган TEMU'ни эсланг). Оддий мисол, бир йил аввал айфоннинг исталган моделини бож тўламай ва яна декларация қилмай Ўзбекистонга олиб кириш мумкин эди. Ҳозир эса 30% бож ва бир тўда оворагарчилик бор. Бир йил аввал қозоқ ва қирғизга эрталаб ўтиб, арзон гўшт ва ёғ, кондиционер ва микропеч олиб келиш мумкин эди, ҳозир бу маъносиз, чунки 30% бож тўлаш ва бир тўда бюрократиядан ўтиш керак. Сўмнинг антиқа мустаҳкамланишида олтин омили, Трамп омили, экспорт ва пул ўтказмалари омили бор, лекин айни шу тўсиқлар кучга киргач ва кучайгач, мустаҳамланиш тезлашганини ҳам эсдан чиқармаслик керак. Шундай экан, сўм мустаҳкамланаётган экан, қулай фурсатни бой бермай, аҳмоқона ва зараркунанда тўсиқ ва божларни олиб ташлашнинг айни мавриди.