Шимол нефти ва бензинидан мажбурликдан эмас, онгли равишда воз кечиш лозим Украина армиясининг босқинчиларнинг нефтни қайта ишлаш заводларига муваффақиятли зарбалари ортидан Россиянинг жанубий, ғарбий ва марказий ҳудудларида бензин танқислиги юзага келган. Танқислик акс-садоси урушдан ихоталанган витрина Москва ва кибор Петербургни ҳам охирги кунларда қамрашни бошлаган. Энергоагентлар тарафидан 2022-2024 йилларда шимол гази, нефти ва бензинига атайин қарам қилинган Ўзбекистонда Россия ўрнатган экспортга чекловлар туфайли жорий йилнинг июль ойида бензин импорти кескин қисқариб кетганди, лекин августда импорт яна тикланган ва барқарорлашган. Энергетика каналининг ёзишича, Ўзбекистон нефть маҳсулотлари манбаларини диверсификация қилиб, бу борада Россияга қарамликни камайтириб, Қозоғистон ва Туркманистон билан ҳамкорликни кучайтирмоқда (келтирилган ҳаволада Argus ахборот агентлигининг эски шарҳлари ўрин олган). Бу албатта жуда қувонарли. Таъкидлар асосли ва ўринли эканини тасдиқлаб олиш учун Статқўмимиз нефть ва нефть маҳсулотлари импорти бўйича маълумотларни ойлар ва мамлакатлар қирқимидаги маълумотларни тақдим этса бўларди. Қачонгача учинчи томонлардан ва текширилиши керак бўлган ахборот олишда давом этамиз? Шу билан бирга, шимол гази, нефти ва бензинидан воз кечиш мажбурликдан эмас, миллий манфаатлардан ва иқтисодий афзалликдан келиб чиқиб амалга оширилишини истаган бўлардик. Токи эртага уруш тугаб, вазият барқарорлашгач яна энергетикани сиёсий товар ўлароқ кўрадиган шимолга қарам бўлиб қолмайлик. 3 000 километрдан миннатли газ, нефть ва нефть маҳсулотлари ташиш қаёқда, ёнимиздан, туркман ва қозоқ қардошлардан 100-300 кмдан ёқилғи келтириш қаёқда? Очкўзлик қилинмай оқилона ёндашилса, нафақат бозоримиз рақобатли таклифлар билан тўлиши, Ўзбекистон ўсиб бораётган Афғонистон иқтисодиёти учун бензин ва дизель етказувчи асосий мамлакатга айланиши мумкин (бир грамм ўз нефти йўқ қирғиз қардошлар Афғонистон бензин бозорини эгаллаётгани сингари).