Ўзбекистон қачон газ экспортини тўхтатади? Газ қазиб олиш қўрқинчли тарзда қисқариб бораётганига қарамай, Ўзбекистон иккинчи йилдирки газ экспортини тинимсиз ошириб бормоқда. Охирги 8 ойда қарийб 500 млн.долларлик ёки минтақаладаги нархлар ҳисобга олинса қарийб 2,5 млрд.куб ҳажмида газ экспорт қилинган. Бу мисол учун, Ўзбекистоннинг барча иссиқхоналарига камида 3 мавсумга етадиган газ дегани. Қазишнинг қисқараётгани, ўсиб бораётган иқтисодиёт ва қўшилган қиймат афзалликлари инобатга олинса, Ўзбекистон аллақачон газ экспортини тўхтатиши керак эди. Бу масала аввал бир неча марта кўтарилган. 2020 йил. "2025 йилгача Ўзбекистон табиий газ экспортини тўхтатиш, уни ўзимизда тўлиқ қайта ишлаш ишлаш, шунингдек қўшилган қийматли маҳсулотлар ишлаб чиқаришни кенгайтириш чораларини кўради". 2022 йил. "Табиий газ экспортининг тўхташи тахминан 2025-2026 йилларга тўғри келади". Лекин амалда энг оғир келган ва бутун энерготизим издан чиққан йилларда ҳам, газ экспорти (гарчи тўхтади дейилганига қарамай) тўхтамай, давом эттирилган.