Хатоларни вақтида ва мардларча тан олиш ҳам иқтисодий тараққиётга хизмат қилади 2017 йилдан пандемиягача бўлган даврда жуда кўп халқпарвар ва иқтисодий соғлом қадамлар ва ўзгаришларнинг катта қисми эски давр хатоларини тан олиш ва тузатиш билан боғлиқ эди. Лекин пандемиядан кейинги ўтган беш йилда иқтисодий тараққиётни секинлаштираётган ва истеъмолчиларга ҳам, бизнесга ҳам зиён етказаётган янги ва янги хатоларга йўл қўйилдики, уларни ҳам тан олиш ва тузатиш вақти аллақачон етган. Шу маънода бир ярим йил аввал киритилган маъмурий чеклов — мева-сабзавот маҳсулотлари учун минимал экспорт нархларини белгилаш амалиётининг бекор қилинишини фақат олқишлаш мумкин. Минимал экспорт нархлари жуда эгилувчан шароитларда ишловчи кичик ва ўрта бизнесга зарба бергани, концентрацияни оширгани, янги экспорт бозорларига рақобатли нархлар билан кириб боришни тўхтатгани, эгри схемаларни шакллантиргани ва бозор динамикасини тушунмайдиган янги бюрократияни яратгани қолди холос. Энди шу билан тўхтаб қолмаслик керак. Тўқимачилик, чарм-пойабзал ва электротехника маҳсулотларининг экспорт нархларига ҳам минимал чекловлар ўрнатилган. Оқибатлар билан курашишдан бошқа натижа бермаган бу қарор ҳам бекор қилиниши лозим. Ўзи умуман нархларга маъмурий аралашув билан боғлиқ норматив ҳужжатлар тўлиқ инвентаризациядан ўтказилса яхши бўларди.