Хатолар ва келтирилаётган зарарларни тан олишади, деб ўйлаганмидингиз? Йўқ, асло. Бизнесга ва пировардида истеъмолчиларга юкланаётган харажатлар ахир уларнинг бутун бошли бизнес моделику. Шунинг учун 6 йилдан бери такрорланаётган ва бағрикенг Газета'да чоп этилган шаблонларни яна қайта ўқиб ҳам ўтирманг. Ёмони улар ҳозирги зараркунандалик кўлами билан чегараланмоқчи эмас. Бу кетишда тиллага, цементга, ёққа, дафтарга, керак бўлса, туалет қоғозигаям маркировка ёпиштиришади. Улар тўхтамайди. Айни пайтда, қарор қабул қилувчиларга ҳам тинимсиз етказиш керакки, иқтисодиёт соҳаларини оқартиришнинг бошқа арзон, рағбатли ва самарали воситалари мавжуд ва етарлича, уларнинг маркировкалашга заррача алоқаси йўқ, қайтанга бу бузуқ тизим оқарган иқтисодиёт субъектларини жазолайди, соядагиларга устунлик беради. Ўзбекистон бизнеси, фаол жамоатчилиги ва ОАВларнинг вазифаси — шу зараркунанда жараён ҳақида тинимсиз бонг уриш, кейинги кенгайишини тўхтатиш бўлиши керак. Кеч бўлсаям, тушуниб етилади барибир.