Денгиз тўла нефть ортилган танкерлар Ўтаётган ҳафтада брент типидаги нефть нархи 65 доллардан 60 долларгача пасайди. Ўғри олигархия ва очофат монополистлар назоратидаги Ўзбекистон ёқилғи бозорига бу ўзгаришларнинг ҳеч қандай таъсири йўқ, албатта. Лекин нарх пасайиши тренди тўғридан-тўғри глобал сиёсат кун тартибини белгилайди. Нефть котировкаларининг пасайиши таклиф ортиқчалиги билан изоҳланмоқда. Bloomberg нашрининг ёзишича, ҳозирда денгизларда сузиб юрган танкерларда жамланган нефть 1,2 млрд.баррелга етган. Бу нефтга талаб кескин тушиб кетган пандемия давридан бери кузатилган янги минимум. Агарда Россиянинг Украинага босқини вақтинчалик сулҳ ёки келишув билан юмшайдиган бўлса, нефть нархи 50 долларгача ҳам тушиб кетиши мумкин. Шунинг учун Россия имкон қадар сулҳни кейинги қолдириш ва чўзишга ҳаракат қилаверади (шундай қилмоқда ҳам). Қизиқ тарафи, агарда Россия сулҳдан яна бош тортса, Трамп Украинага Tomahawk ракеталарини берган тақдирда, асосий нишонлар айнан Болтиқ денгизи ва Қора денгиз ва нефть терминаллари (Приморск, Усть-луга, Новороссийск, Тамань) бўлиши мумкин. Бу сценарийда Россиянинг ютқизиғи янада кўпроқ бўлади. Айнан нефть билан боғлиқ глобал ўзгаришлар ёвузлик империяси - Совет иттифоқини қулатган эди, кейин 21- аср бошида нефть нархининг осмонга чиқиши Россияни янги Совет иттифоқига айлантирганди.