Монополиялар ва концентрация, тариф ва нотариф тўсиқлар, энергетик таъминот нобарқарорлиги, транспорт муаммолари ечилмагунча инфляция барқарор пасаймайди Кечаги анжуманда келгуси йилларда инфляциянинг паст даражада барқарор шаклланишини таъминлашда алоҳида аҳамият қаратилиши лозим бўлган масала – инфляциянинг таклиф билан боғлиқ фундаментал омилларини бартараф этиш муҳим эканлиги қайд этиб ўтилди. Бунда, биринчи навбатда, ички бозорда рақобат муҳитини кучайтириш, тариф ва нотариф чекловларни камайтириб бориш билан ташқи савдо эркинлигини яхшилаш, бунда товарлар импортида концентрациялашув даражасини пасайтириш, товар ва хизматлар таклифининг оширишни таъминлашга қаратилган энергия ресурсларини етказиб бериш узлуксизлиги ва етарли даражада транспорт инфратузилмаси потенциалини шакллантириш каби чораларни амалга ошириш кераклиги таъкидланди. Шу билан бирга, давлат корхоналарини трансформация қилиш ва хусусийлаштириш жараёнларини фаоллаштириш, директив ва имтиёзли кредитлашни камайтириш ҳамда капитал бозорини такомиллаштириб бориш пул-кредит сиёсати қарорлари самарадорлигини оширишда муҳим ўрин тутиши га эътибор қаратилди. Пул-кредит сиёсати қарорларини трансмиссиясини яхшилаш бўйича пул-кредит операцион механизмини такомиллаштириш бўйича чоралар, макроиқтисодий прогноз ва таҳлил салоҳиятини мустаҳкамлаш бўйича мавжуд модел тизимлари параметрларини қайта баҳолаш ва янги моделлар билан бойитиш, ҳамда пул-кредит сиёсати коммуникациясини кучайтириш юзасидан чора-тадбирлар режалаштирилганлиги маълум қилинди.