​Энергетиклар иссиқхоналарга газ бермаса нима бўлади? Дастурга кўра, Тошкент шаҳар ва Тошкент вилоятида мавжуд иссиқхона хўжаликларини табиий газ билан барқарор таъминлаш бўйича зарур ташкилий-техник чора-тадбирлар тўғрисида таклифлар ишлаб чиқиш топширилган. Бунда: мавжуд иссиқхона хўжаликларининг табиий газга бўлган эҳтиёжи, мавжуд қувватлар ва тармоқларга уланиш имкониятларини таҳлил қилиш; иссиқхона хўжаликлари жойлашган ҳудудлардаги газ тақсимоти тармоқларининг техник ҳолати ва мавжуд қувватини хатловдан ўтказиш; энергия тежамкор иситиш технологияларини жорий этиш, шу жумладан, табиий газдан самарали фойдаланиш ва альтернатив манбалар (биогаз, қуёш энергияси) билан уйғунлаштириш имкониятларини ўрганиш; табиий газ билан узлуксиз таъминлаш бўйича мавсумий графиклар, лимит ва тариф механизмларини такомиллаштириш, иссиқхона хўжаликлари фаолиятида узилишларнинг олдини олиш чораларини кўриш белгиланган. Қирқ кун аввалги ҳужжатга кўра, Энергетика вазирлиги шартномаларда табиий газ етказиб берилмагани натижасида йўқотилган ҳосил учун етказиб берувчининг жавобгарлигини аниқ белгилаб бериши кераклиги кўрсатилган эди. Энергетиклар 2023 йил март ойидан то кеч кузгача Ўзбекистон бўйича 2500 гектарлик жами 1147та иссиқхонани газдан узишган. Газдан узилган иссиқхоналарнинг 59таси Тошкент вилояти, 20таси Тошкент шаҳрида жойлашган. 2024 йилда ва 2025 йилнинг ўтган даврида газдан узилган иссиқхоналарнинг аниқ сони ва рўйхати, шунингдек, айни дамда кўмир ва бошқа ёқилғидан фойдаланаётган иссиқхоналар ҳақида очиқ маълумотлар мавжуд эмас.