S&P ҳам Ўзбекистон суверен рейтингини оширди S&P рейтинг агентлиги Ўзбекистоннинг узоқ муддатли суверен кредит рейтингини “ВВ-”дан “ВВ” даражасигача кўтарган. Прогноз – барқарор. Ташқи ва фискал тақчилликлар кутилганидан ортиқ заифлашса (масалан, савдо шартларининг ёмонлашуви, давлат харажатлари даражасининг ошиши, қарз олиш харажатларининг сезиларли даражада кўтарилиши ёки кутилмаган шартли мажбуриятларнинг рўй бериши), Ўзбекистондаги давлат корхоналари секторининг катта ҳажмини ҳисобга олган ҳолда, рейтинг пасайтирилиши мумкин. Шунингдек, агар ўсиш суръатлари прогноз қилинганидан сезиларли даражада паст бўлиб чиқса, қарз ҳисобига молиялаштирилаётган инвестиция лойиҳаларидан кутилган иқтисодий фойда анча кам бўлса ёки бундай лойиҳаларни якунлаш учун харажатлар сезиларли даражада юқори талаб қилинса ва бу Ўзбекистоннинг фискал ҳолатини заифлаштирса, салбий рейтинг ҳаракатлари қўлланилади Агар Ўзбекистоннинг бюджет ва жорий ҳисоб тақчилликлари иқтисодий самарадорликка путур етказмасдан камайса, рейтинг оширилиши мумкин. Агентлик 2025 йилда Ўзбекистонда ЯИМ ўсиши 6,8% даражасида бўлишини ва номиналда 134,1 млрд.долларга етишини кутмоқда. Инфляция 8,9%. Ишсизлик 5,5%. Йил охирига доллар курси кутилмаси 12 050 сўм. Июнь ойида Fitch Ўзбекистон суверен кредит рейтингини “BB-“дан “BB” даражасигача оширганди. Ўтган йили октябрда илк марта мамлакат суверен рейтингини инвестицион даражага олиб чиқиш вазифаси қўйилган эди (2025 йил июндаги Инвестицион форумда 2030 йилга бориб, Ўзбекистоннинг кредит рейтингини “инвестицион” даражага олиб чиқиш мақсади эълон қилинган).