Солиқ ҳам электрга боғланади: Ягона биллингни йўлга қўйиш топшириғи унутилдими? Келаси йилдан мол-мулк ва ер солиғи бўйича умумий суммаси 1 млн сўмдан ошган солиқ қарздорлигини ундиришда электр энергиясининг биллинг тизими механизмидан фойдаланишни жорий этилиши мумкин. Аввалига мазкур тажриба 2026 йил 1 январдан бошлаб Наманган вилоятида қўллаб кўрилади. Бир қарашда бу солиқ йиғишда замонавий, рақамли ва илғор тажрибадек кўриниши мумкин. Лекин нақ 8 йилдан буён истеъмолчилар учун ягона биллинг яратиш вазифаси намойишкорона бажарилмаётган, пайсалга солиниб, ижроси қолаётган бир шароитда, масала давлат манфаатларига тақалганида зудлик билан амалиётга киришиш мумкинлиги ўйлантирмасдан қолдирмайди. Худди шунингдек, чиқинди учун тўловларни электрга боғлашда ҳам шу каби бир ёқлама ва антиижтимоий иш тутилганди. Солиқ тўловларини ундиришда, чиқинди учун тўловларни йиғишда электрга тўловни чеклашдек таклифини илгари сураётганлар наҳотки тушунишмаса, энг тўғри ва самарали йўл бу аслида ЖШШИРга боғланган барча тўловлар учун Давлат раҳбари таклиф этган ягона биллингни жорий қилиш эканини? Нега давлатнинг ҳам, фуқароларнинг ҳам манфаатларини бирдек ифода этиш мумкинмас?