Туристларбоп 15та "бренд товар" учун пасайтирилган божлар қўлланади Халқаро брендлар товарларининг айрим турларини бренд эгалари ёки уларнинг ваколатли етказиб берувчилари (расмий дистрибьюторлар, дилерлар, ишлаб чиқарувчиларнинг савдо вакиллари ва уларнинг дистрибьюторлари, лицензиатлари) билан тузилган тўғридан-тўғри шартнома асосида Ўзбекистон Республикасига олиб киришда (импорт қилишда) импорт божхона божининг пасайтирилган ставкалари қўлланиладиган товарлар рўйхатига ўзгартиришлар киритилган. 2022 йилда тасдиқланган, пасайтирилган божлар қўлланадиган рўйхатдаги товарлар сони 55тадан 70тага етган. Рўйхатдаги товарларни импорт қилишда паст ставкалар шунчаки қўлланилмайди, аввал импортчи Тариф ва нотариф тартибга солиш кенгашининг Реестрига кириш керак. Масалан, оддий импортчи кийим-кечак, айтайлик, пальто (ТИФ ТН 6101) импорт қилса, 20%, лекин ҳар бирига 3 доллардан кам бўлмаган импорт божи тўлайди. Реестрга кирган, қайсидир пўрим моллда ўтирган "Бренд товар сотувчиси" эса 7,5% бож тўлайди. Охирги йилларда Тошкентда "бренд товар" сотувчи расмий дўконлар пайдо бўлди, лекин уларда ассортимент жуда кам, мавсумий товарлар кечикиб янгиланади, етарли рақобат йўқлиги учун нархлар Истанбул ё Алматидаги худди шу каби дўконлардан анчагина қиммат. Шунинг учун танловсиз ўзбекистонликлар ҳалигача чўнтагига қараб кийиниш учун Истанбул, Дубай ва Миланга қараб йўл олади ёки турли воситачилар буюртма қилади. Божлари пасайтирилган "бренд товарлар" навбатдаги рўйхатига кофе, шамлар, ошхона идишлари ва жиҳозлари, тўқилган материаллар, матоли гиламлар, одеяллар, чойшаблар, пардалар, чинни ва керамикадан буюмлар, идиш товоқлар, қошиқ-вилкалар киритилган. Рўйхат билан танишганлар бу ўзгаришлар кўпроқ "tax free" тизимидаги дўконлар ва туристлар учун қилинганини тушунишлари мумкин (Ўзбекистон аэропортларидаги tax free дўконларининг ҳозирги ғариб аҳволини ва осмон нархларини кўрганлар билади).