Мустаҳкамланган сўмга раҳмат Монополист Ўзбекистон темир йўллари 4 йил деганда ниҳоят молиявий натижаларини очиқлаган (аввалги зарар кўрилган йилларда молиявий ҳисоботлар яшириб келинган). 2025 йилнинг 9 ойи натижаларига кўра, компания 1,3 трлн.сўмлик соф фойда қайд этган (ўтган йилнинг шу даврида 328,5 млрд.сўм зарар кўрилган). Мусбат молиявий натижанинг асосий компонентини валюта курси ўзгаришидан даромадлар ташкил этган (1,8 трлн.сўм). Компанияда шаклланган қисқа валюта позицияси (валютадаги мажбуриятларнинг валютадаги активлардан кўплиги) йил бошидан буён сўм мустаҳкамланиши ҳисобига ижобий фарқ яратган. Шунингдек, компаниянинг фоиз харажатлари қисқарган (ҳам фоизлар пасайиши, ҳам валютадаги курс фарқи ҳисобига). Баланс ва молиявий натижалар ҳисоботидан монополист олган субсидиялар миқдорини кўриш имконсиз (пул оқимлари ҳисоботида аниқроқ акс этади). Ўзбекистон темир йўллари тарифларини кетма-кет ошираётганига қарамай, энг катта субсидия ўзлаштирувчилардан ҳисобланади. Компаниянинг қарзлари ортишда давом этмоқда. Хусусан, ўтган йилнинг шу даврига нисбатан Ўзбекистон темир йўлларининг банк кредитларидан қарзлари 22,4 трлн.сўмдан 24,0 трлн.сўмгача ошган. Ўтган йилларда йиғилган тақсимланмаган зарари 2,7 трлн.сўмдан 1,4 трлн.сўмгача камайган.