Олигархияга текинга совға қилинган Самарқандкимё заводининг улушини Ўзкимёсаноат қайта сотиб олдими? Бунақа ғалати ишлар фақат янги Ўзбекистонда бўлса керак. Қарийб 6 йил аввал Ўзбекистондаги энг йирик кимё заводларидан бўлган Самарқандкимё АЖ устав капиталининг 100% улуши ўша пайтда Кипрда рўйхатдан ўтган «Ferkensco Management Limited»га ноль қийматда берилган, яъни совға қилинган эди. Ўшандан буён кипрлик "инвестор" совға қилинган завод бўйича мажбуриятлари — 200 млн.долларлик инвестиция киритдими, мураккаб минерал ўғитлар ишлаб чиқаришнинг замонавий, экологик жиҳатдан зарарсиз мажмуаси ишга тушдими ( 600 минг тонна минерал ўғитлар, жумладан 300 минг тонна моноаммонийфосфат ва 300 минг тонна мураккаб минерал ўғитлар), заводнинг қарзларини ёпиб, камида 500 ишчи ўрнини яратдими, билмаймиз (бу ишларни яширинча хусусийлаштириш оталари қилиши керак). Билганимиз шуки, кипрлик "инвестор" уруш бошлангач, гонконглик "инвесторга" айланган. Энг қизиғи мана 6 йил ўтиб бўлаяпти. Ўзкимёсаноат АЖ Самарқандкимё АЖнинг қарийб 25% улушини сотиб олаяпти. Қанчага сотиб олгани номаълум, лекин муаммо шундаки, айнан шу Ўзкимёсаноат АЖ 6 йил аввал заводдаги 39,65% улушини кипрлик инвесторга текинга берган эди. Бу нима ўзи? Коррупциями? Эски тешикларни ёпишми ё олигархия фойдаси учун янги шиширилган ўзлаштиришларга тайёргарликми? Ўзкимёсаноатнинг бунақа схемалардаги иштироки биринчи марта эмас. 2023 йилда ФРРУ Деҳқонобод калий заводига ўзи берган триллионлаб кредитини ўзи ёпиш схемасида иштирок этган эди (кредити ёпилгач, Деҳқонобод калий заводи яширинча хусусийлаштириб юборилди). Дарвоқе. Шонли энергетиканинг укасига айланган кимё соҳасидаги яширинча ва ёпиқ хусусийлаштиришлар (Самарқандкимё, Деҳқонобод, Қўнғирот... рўйхатни яна давом эттиравериш мумкин) ва қўлланилаётган схемалар ҳақида халқаро молия ташкилотлари жуда яхши билади, нафақат билади, балки консультант ва маслаҳатчилари воситасида билвосита иштирокчи ҳам.