Пудрат қироллари билан ҳам шартномалар қайта кўриб чиқиладими? Ўзбекнефтегазнинг оператив фаолиятида, тушумлар ва олинаётган қарзларнинг ишлатилишида пудратчиларнинг ўрни ва кўлами мисли кўрилмаган даражага чиққан. Таннарх айнан шу жойда шишади ва шиширилади. 40 кун аввал 7 ойлик фирмалар билан триллионлик битимлар тузилгани ҳақида ёзгандик. Қудуқ қазиш билан боғлиқ капитал харажатлар концентрацияси шунчалар шишганки, бунга аудиторлик компанияси ҳам кўз юмиб кета олмаган. Шундай экан, газ қазиб чиқариш бўйича хусусий операторлар масаласини қайта кўриб чиқиш, мажбуриятларини бажармаётганларини ўрнига очиқ тендерлар асосида янги инвесторларни жалб этиш вазифаси қўйилгани яхши. Лекин пудратчилар билан боғлиқ "харажати компанияга, фойдаси пудратчига" "бизнес-модели" таг-томири билан ўзгартирилмаса, икки ўнбеш бир ўттизлигича қолаверади.