​Алоқа компаниялари ва Yandex'дан ҳам солиқ тушумлари қисқариши тўхтагани йўқ Хизмат кўрсатиш соҳасида фаолият кўрсатувчи солиқ тўловчиларнинг Топ-20 рўйхатида алоқа компаниялари ва YandexGo UB тўлаётган солиқлар қисқаришдан тўхтамаган. 2024 йилнинг 11 ойида 1 247,6 млрд.сўм солиқ тўлаб сегментда энг йирик солиқ тўловчи бўлган Ўзбектелеком 2025 йилда 1 118,3 млрд.сўм солиқ тўлаган. Солиштирилаётган даврда солиқ тушумлари: Unitel МЧЖда 587,3 млрд.сўмдан 457,6 млрд.сўмгача; Coscom МЧЖда 413,7 млрд.сўмдан 286,5 млрд.сўмгача камайган. Янги хўжаси "тайинланиш" арафасида турган UMS МЧЖдан солиқлар тушуми 346,8 млрд.сўмдан 190,5 млрд.сўмгача қисқариб кетган. Эслатиб ўтамиз, уяли алоқа операторларига солиқ юки камайтирилганига қарамай, 2024 йилда ҳам, 2025 йилда ҳам бирин-кетин тарифларни оширишда давом этишмоқда. Алоқа операторларининг кам солиқ тўлаш мусобақасида YandexGo UB МЧЖ ҳам қўшилган. Монополист агрегатор тўлаган солиқлар солиштирилаётган даврда 134,2 млрд.сўмдан 107,9 млрд.сўмгача камайган. Хизмат кўрсатиш соҳасида йирик солиқ тўловчилар рўйхатидаги аномалия — Gid license plate МЧЖ ҳақидаги 2024 йилдаги маълумотлар ўчириб юборилганича қайтиб тиклангани йўқ. Шунингдек, 2025 йилнинг 11 ойида йирик солиқ тўловчилар рўйхатидан 2024 йил етакчилари қаторидаги —Roodell МЧЖ (2024 йил 11 ойида 109,7 млрд.сўм солиқ тўлаган), Uzbekistan Airways technics МЧЖ (93,4 млрд.сўм) ва Qanot Sharq МЧЖ (75,4 млрд.сўм) тушиб қолган.