Энергетика вазирлиги: водийда кеча 417та метанзаправка ишлаган Энергетика вазири матбуот котиби Дилдора Ҳошимованинг Дарёга маълум қилишича, метан заправкалар онлайн режимда кузатиб борилмоқда ва водийда якшанба, 25 январь куни 417 та метан заправка табиий газ олган. "Якшанба кунги маълумотда, Фарғона вилоятида 160, Андижон 131 та ва Наманган вилоятида 126 та заправка газ олгани кўриниб турибди, бу онлайн тизим", — деган матбуот котиби. Ишлаётган метан заправкалар бўйича онлайн тизим бўлса, платформани очиб қўйишга ким ёки нима тўсқинлик қилади, деган саволларни охирги 3 йилда тинимсиз такрорламоқдамиз. Кеча Avval iqtisod... дастурида шу саволни яна такрорладик. Маълумот учун водийда жами 450та метан заправка мавжуд. Энергетика вазирлигига ишонилса, водийдаги 93 фоиз заправкалар ишлаб турипти. Лекин бутун водий туманлари аҳолиси 6 январдан буён метан заправкалари хизматидан фойдалана олишгани йўқ. Охирги кунларда эса ижтимоий соҳа ва давлат хизматлари учун автотранспорт воситалари ҳам, хусусан жамоат транспорти метан ёқилғиси қуя олмагани учун фаолияти тўхтаган ёки чекланган.