Ўзбекнефтегаз ҳисобига олинган метан контейнерлар тақдири нима бўлди? “Долзарб 100 кунлик”нинг 50 куни натижалари ҳақидаги Ўзбекнефтегаз брифингида 150 дона метан контейнерлар ва уларнинг кейинги тақдири ҳақда бирон-бир маълумот келтирилмаган. Водий вилоятларига қиш кунларида метан ташиши керак бўлган контейнерлар айнан Ўзбекнефтегаз ҳисобидан сотиб олинган, лекин компаниянинг ўзи бу ҳақда бирон марта расмий ахборот бермаган (лойиҳа қиймати, молиялаштириш манбалари, иқтисодий самарадорлиги ва қоплаш муддати). Энергетика вазири 22 декабрда ишга тушишини ваъда қилганига қарамай, мана 2 кундан кейин баҳор келаяпти ҳам, контейнерлардан дарак йўқ. Брифингда шунингдек, 7 ойлик фирмалар билан тендерсиз тузилган триллионлик битимлар, Socar компанияси билан имзоланган маҳсулот тақсимотига оид битим доирасида қурилиши айтилган нефтни қайта ишлаш заводи, МТО заводи каби лойиҳаларнинг истиқболи ҳақида мавзуларга ҳам тўхтатилмаган. Тежалган ва иқтисод қилинган маблағлар ҳақидаги маълумотлар тобора қисқараётган солиқ тушумларининг ортиши, шунингдек молиявий натижаларнинг яхшиланиши ва тинимсиз ошаётган нархларнинг пасайиши билан тасдиқланади, деб умид қиламиз.