Янги бекатлар дўкон-бекатлардан афзалроқ бўладими? Ҳар гал бекатлар масаласи кўтарилганида эгалик қилиш ёки тасарруф этиш ҳуқуқини тасдиқловчи ҳужжатлари йўқ дўкон-бекатлар ёмонотлиқ қилинади. Лекин бирон марта шу бекатларга дўкон қуришга рухсат берганлар ким эди ўзи, деган савол кўтарилмайди. Бирон бир бекатга битта будка қўйишга уриниб кўрган билади, 15 минутда 15та назоратчи пайдо бўлади. Унда юзлаб бекатлардаги дўконларга “рухсат”ни ким берган? “Жавоб” деб кимлар айтган? Демак, балогардон дўкон очган тадбиркорлар эмас, ўша ваколатини суистеъмол қилган валломатлар жавоб бериши керак, улар “топилмаса”, ҳокимият масъулиятни ўз бўйнига олиб, дўкондорларга бошқа жой ё компенсация бериши зарур. Яна бир гап: пандемиядан олдин ва пандемиядан кейин шу бекатларда жойлашган дўконлар эгаларига бекатларни иситиш-совутиш учун ихтиёрий-мажбурий конструкциялар, кондиционерлар ўрнаттирилганди. Ўшанда уларнинг ҳужжати бор-йўқлигини ўшанда негадир суриштиришмаганди. Бу дўкон-бекатлар ҳужжатлими ё йўқми, ҳартугул йўловчиларни ёзда иссиқдан, қишда совуқдан асрайди. Лекин қайта-қайта ҳар 3-4 йилда алмаштириладиган ва янгиланадиган конструкция бекатлар қишда совуқ ва ёмғир-қордан ҳимоя қилмайди. Ёзда жазирама иссиқ ва зарарли нурдан. Имконияти чекланганлар учун ҳеч нарса ўзгармайди. Лекин бекатларда реклама жойлаштириш учун ижара ҳуқуқи отнинг калласидек нархда сотилади. Бекат алмаштириш солиқ тўловчиларга қанчага тушади, яна номаълум. Шартларини очиқлаб, лотларга бўлиб, шаффоф тендер қилишга ким ёки нима тўсқинлик қилади? Бугунги Тошкент 20 йил аввалги Тошкент эмас-ку.