Wildberries Bank ва қирғиз банклари қора рўйхатда: 20- пакет санкцияларида яна кимлар бор? Европа иттифоқи ниҳоят Россиянинг Украинага босқинига қарши қаратилган 20- пакет санкцияларни маъқуллаган. Европа кенгашининг очиқлаган релизига кўра, янги санкциялар Хитой, БАА, Қозоғистон, Беларусь ва Ўзбекистонда жойлашган 16та компанияни ҳам қамраган. Очиқламаларга кўра, иккита қирғиз банки (Capital Bank of Central Asia ва Керемет Банк), битта Озарбайжон ва Лаос банки санкцияларни СПФС тизим орқали айланиб ўтгани учун қора рўйхатга қўшилган. Шунингдек, санкциялар чеклови босқинчи Россиянинг 20та банки (улар орасида Wildberries Bank ҳам бор) ва 46 кемаси, 117 нафар жисмоний шахс, Башнефть, Славнефть ва унинг шўъбалари, бир нечта нефтни қайта ишлаш заводлари, Лукойл ва Газпромнинг аффилланган тузилмалари, Москва физика-техника институти, Согласие суғурта компанияси ва Роснефтефлот компанияларни ҳам ўз ичига олган. Европа иттифоқи Қирғизистонга рақамли дастурий бошқарувга эга станок ва радиоускуналар экспортини Россяига реэкспорт хабари сабабли тақиқлаган. Қўшниларнинг A7A5 стейблекойни билан савдо қилувчи криптобиржаси оператори TengriCoin ҳам қора рўйхатга тушган.