​Банк тизими даромадлилиги 6 йиллик максимумларга қайтмоқда Ўзбекистон банклари 2026 йилнинг дастлабки 3 ойида 5,5 трлн.сўмдан ортиқ соф фойда олишган. Бу ўтган йилнинг шу даврига нисбатан 61,5% ёки 1,1 трлн.сўмга кўп дегани. Фойданинг кескин ошиши фоизсиз даромадларнинг сезиларли кўпайгани фонида, шунингдек, кредит ва лизинг бўйича кўрилиши мумкин бўлган зарарларни баҳолаш ҳаражатлари қисқариши ҳисобига рўй берган (кейинги йилларда банклар захира яратиш билан боғлиқ харажатлари фақат ошиб келаётган эди). Шундай қилиб, банк тизимининг капитал рентабеллиги 16,0%га етган. Ўзбекистон банк тизими охирги марта бундан юқорироқ фойдалиликни пандемия бошланишидан олдинги даврда кўрсатган эди.