​Аҳоли даромадларининг ўсиши секинлашган 2026 йилнинг дастлабки чорагида аҳолининг умумий даромадлари реал ўсиши 7,8%ни, жон бошига реал ўсиши эса 5,8%ни ташкил этган (ўтган йилнинг шу даврида мос равишда 9,8% ва 7,6% ўсиш қайд этилган). Даромадлар ўсишининг секинлашуви асосан трансфертлар (пул ўтказмалари) ўсиши суръати пасайгани билан боғлиқ. Ҳудудлараро аҳоли жон бошига даромадларнинг энг юқори ўсиши яна Тошкентда (10,3%). Энг паст ўсиш эса пул ўтказмаларига юқори даражада боғланган Хоразм (2,8%) ва Фарғонада (2,9%). Ўтган йили шу даврда аҳоли жон бошига даромадларнинг энг юқори ўсиши айнан Фарғонада қайд этилганди. Даромадларнинг ҳудудлар бўйича кескин табақаланиши янада кучайган. Энг бой Тошкент ва энг кам даромадли Наманган ўртасидаги фарқ 4,14 каррага етган (ўтган йили шу даврда 3,99 карра эди). Даромадлар таркибида ўзбандлар даромадлари улуши 27,7%дан 29,8%гача ортган бўлса, трансфертлар улуши 29,9%дан 27,5%гача тушган (хусусан, пул ўтказмаларининг жами даромадлардаги улуши ўтган йилги 19,5%дан 17,5%гача пасайган). Жами даромадларда пул ўтказмаларининг энг юқори улуши Андижонда қайд этилган — 31,2% (ўтган йили шу даврда 33,0% бўлган).