"Йилига 2 трлн.сўм солиқ тўлайди" дейилган GTL завод 2,8 трлн.сўмлик солиқ имтиёзи олган Антикоррупция агентлиги очиқламасига кўра, энергетика ва ёндош пудрат қироллари олган солиқ ва божхона имтиёзлар кескин ортишда давом этмоқда. Энг кўп солиқ имтиёзидан фойдаланган ташкилот Uzbekistan GTL МЧЖ бўлган. Йилига 2 трлн.сўм солиқ тўлайди дея бардорланган ва космосдан кўринадиган энергогигант 2025 йилда 2,8 трлн.сўм солиқ имтиёзидан фойдаланган. GTL заводнинг "отаси" Ўзбекнефтгаз эса 1,7 трлн.сўм имтиёз ўзлаштирган. 2024 йилда эълон қилинган шу каби ҳисоботда Uzbekistan GTL имтиёз олган компаниялар рўйхатида бўлмаган, Ўзбекнефтегаз фойдаланган имтиёзлар эса ўнлаб карра кам бўлган. Эҳтимолки, Ўзбекнефтгаз ва GTL завод "рейтинги яхшиланиши ва янги қарзлар олишга имкон" учун 2024 йилнинг иккинчи ярмидан қўшимча имтиёз ва преференциялар берилган бўлиши мумкин (тўланаётган солиқлар кескин қисқариб кетганиям бунга далолат). Агар тўлиқ бўлмаган рўйхатга назар ташласангиз, энергетикага оид компанияларнинг солиқ имтиёзлари 6,4 трлн.сўмдан, божхона имтиёзлари 4,2 трлн.сўмдан ошганини кўришингиз мумкин (шунингдек, ёндош пудрат ташкилотлари 1,9 трлн.сўм божхона имтиёзлари олишган). Яъни, ўзбекистонлик истеъмолчилар шонли энергетика учун нафақат қиммат тарифлар ва солиқлар (бюджетдан энергосубсидиялар), балки мисли кўрилмаган ва ошиб бораётган имтиёзлар билан ҳам товон тўлашмоқда. Дарвоқе, Президент фармони билан белгиланган талабларга кўра, солиқ ва божхона имтиёзлари ҳамда преференциялар, шу жумладан индивидуал имтиёзлар берилган субъектларнинг бенефициарлари (якуний манфаатдор жисмоний шахслари) ҳам очиқланиши кераклиги кўрсатилган. Антикоррупция агентлиги солиқ ва божхона имтиёзлари олувчилар рўйхатини тўлиқ қилиш билан бирга, имтиёзхўрларнинг бенефициарларини ҳам кўрсатишга ўтишини кутиб қоламиз.