Энергетикадаги тубга қулаш солиқ тушумлари кескин пасайишида яққол акс эта бошлаган Бошқа рақобатли соҳаларда солиқ тушумларининг барқарор ўсиши юз бераётган бўлса, тубга ботаётган энергетикада бунинг бутунлай акси юз бермоқда. Ўтган 7 ойда 2023 йилнинг 7 ойи билан солиштирганда ёқилғи-энергетикага дохил давлат компанияларида солиқ тушумлари кескин пасайган, хусусан: Ўзбекнефтегазда 3 019,6 млрд.сўмдан 2 290,7 млрд.сўмгача (-24,2%); Бухоро нефтни қайта ишлаш заводида 707,8 млрд.сўмдан 410,3 млрд.сўмгача (-42,0%); Uz-Kor Gas Chemical МЧЖда 547,6 млрд.сўмдан 170,5 млрд.сўмгача (- 3,2 карра); Uzbekistan GTL МЧЖда 254,4 млрд.сўмдан тахминан 120 млрд.сўмгача (- 2,1 карра); Issiqlik elektr stanstansiyalari АЖда 816,4 млрд.сўмдан 363,3 млрд.сўмгача (-2,2 карра) қисқариб кетган. Эсингизда бўлса, 2024 йилнинг биринчи ярим йиллигида энергетикага бюджетдан 10,8 трлн.сўмдан ориқ субсидиялар ажратилгани маълум бўлган эди (7 ойда бу миқдор янада кўпайгани аниқ). Бошқача айтганда, шу кунга етиб келдикки, ўзбек энергетикаси бюджетга тўлаётган солиғидан кўра бюджетдан олаётган субсидиялар кўпроқни ташкил этмоқда . Яъни улар том маънода паразитга айланиб бўлишган. Шимоллик босқинчиларнинг энергетик игнасига онгли равишда ўтказилган энергетикада ишлаб чиқаришнинг аҳволи яна қанақа бўлиши мумкин эди? Юқоридаги рақамларда яна бир яширин жиҳат бор. Бу энергетикадаги компанияларнинг солиқ имтиёзлари. Масалан, бюджетга солиқ тушумларини 3 каррадан кўпроқ камайтириб юборган Uz-Kor Gas Chemical МЧЖ 224,4 млрд.сўмлик солиқ имтиёзларига эга. Ўзи мисли кўрилмаган солиқ имтиёзларига эга, яна солиқ тўлашни каррасига қисқартирган. Зўр а? Бу қанақа компания ўзи дейдиганлар учун, эслатиб ўтаман: Uz-Kor Gas Chemical МЧЖ аввалги йилларда Ўзтрансгазни 1 млрд. долларга қарз қилиб қўйган ва бу қарз шу йил баҳорда Ўзбекнефтегаз бўйнига. яъни сиз ва бизнинг зиммамизга қайтадан осилган. Дарвоқе, Ўзтрансгаз на ишлаб чиқарувчилар, на хизмат кўрсатувчилар қаторида йирик солиқ тўловчилар рўйхатига тушган. Яширин қарор билан ишончли бошқарувга бериб юборилган ва қачонлардир Ўзбекистоннинг энг йирик солиқ тўловчиси ва рентабелли компанияси балки энди Ўзбекистон учун эмас, олигарх чўнтаклар манфаатларига ишламоқда.