Сенаторларимиз картага нақд пул киритиш учун комиссияларни ноллаштириш масаласини кўтарадими? Сенатор Қутбиддин Бурхонов Сенатнинг ўтган кунги йиғилишида банкоматлар пулни ҳисобдан ечиб, нақд пул бермаслиги ёки картани ушлаб қолиши билан боғлиқ 290 мингта ҳолат қайд этилгани ҳолатини келтириб, муаммони тезкор ҳал қилиш механизмлари амалда жорий этилмаганини танқид қилган (27:00 дақиқадан кўринг). Албатта, сенаторимизнинг қайғурганича бор, юз минглаб ўзбекистонликларнинг муаммоси масъул идораларни жиддий ўйлашга ундаши керак (мазкур муаммо бўйича Марказий банк қатъий амалий ҳаракатларни бошлаган). Карта ва тўловлар билан боғлиқ аҳоли кайфиятига бевосита ёмон таъсир кўрсатаётган муаммолар қанийди шу билан тугаса. Узоққа бормайлик, картага нақд пул киритиш учун комиссияларни бекор қилиш масаласи неча ойдирки, пайсалга солинади (креатив индустрия учун мисли кўрилмаган имтиёзлар ундириш кунлар ичида ҳал бўлаётган бир пайтда). Муаммо қатор сегментларда нақдсиз тўловлар тизимига мажбурий ўтилган 1 апрелдан кейин мингларнинг эмас, миллионларнинг кундалик муаммосига айланган. Ўзбекистонликлар росмана тушунмаяпти, нега уларнинг 100 минг сўм нақд пули картага солинганида 97 мингга айланиб қолиши керак? Нега улар қайсидир чўнтак корчалонлар триллионлаб дивиденд олиб хорижга ҳайдашлари учун ўлпон тўлашлари керак? Балки сенаторларимиз тушунтириб беришар? Балки сенаторларимиз сўров юборишар, мумкин бўлса сенатга чақиришар?