Маҳаллага томдан жой тегадими ё ертўладан? Тошкентда яширин қарор билан бошланган ва охирги қолган-қутган ер майдонларини эгаллаш воситасига айланган маҳалла марказлари қуриш тажрибаси энди қолган ҳудудларга ҳам ёйиладиган кўринади. Энди бутун Ўзбекистон бўйлаб тадбиркорларнинг МФЙ биноларини ДХШ асосида қуриши таклиф қилинмоқда. Биноларнинг бир қисмига маҳалла «еттилиги»ни бепул жойлаштириш, қолганидан кичик цехлар ва сервис объектлари сифатида фойдаланиш режалаштирилган (маҳаллани бинонинг айнан қайси қисмига жойлаштириш масаласига аниқлик киритилмаган). 2024-2025 йилларда пойтахт Тошкентда квартал ва маҳаллалар ўртасида қолиб кетган охирги бўш ер майдонлари, аукцион ўтказмасдан, ёпиқ қарорлар билан хос тадбиркорларга берилган ва бу жойларда сароймонанд 5,7 қаватли ва ҳатто ундан ҳам баланд "Маҳалла марказлари" қурилган (қизиққанлар бу биноларга кириб кўришлари ва аслида қандай мақсадларда ишлатилаётганини билишлари мумкин). Ўтган йилги йиғилишларда маҳалла марказлари қурган тадбиркорларга 7 йилгача солиқ имтиёзлари берилиши ҳақида ҳам таклифлар янграган. Балки бу бинолар ДХШ асосида қурилар экан, ғолибларни ёпиқ кабинетларда эмас, очиқ аукцион ўтказиб, энг яхши шартларни ва таклифларни берган талабгорлар билан битим тузиш адолатли бўлар?