​21- пакет: WB банкдан Яндекс банккагача, Россельхозбанкдан Москва биржасигача, тарихчи Мединскийдан банкир Беловгача Европа иттифоқи босқинчи Россияга қарши санкцияларнинг навбатдаги 21- пакетига кирган 48 нафар жисмоний ва 168 юридик шахслар рўйхатини очиқлади. Санкцияларнинг бу сафарги радари босқинчилик урушини қўллаётган банклар, энергетика компаниялар, криптовалюта тизими, пропагандачилар ва олигархларнинг яқинларини қамраган. Йирик банклардан Россельхозбанк, финтек-олигархик тузилмаларнинг чўнтак банклари WB банк, Озон банк, Яндекс банк, МТС-банк қатори нақ 94та банк санкцияга тушган. Тақиқларни четлаб ўтишга кўмак бериб келган Москва биржаси, А7 тўлов тизими билан боғланган агентлар, криптовалюта платформалари ҳам қора рўйхатга кирган. Шунингдек, санкциялар пакетига электр энергияси экспортчиси Интер РАО, 4та нефтни қайта ишлаш заводи (яқинда зарба еганлари бор), тоғ-кон саноати (олмос ва олтин...), аэропортлар (Шереметьево...) ҳам қўшилган. Жисмоний шахслар орасида шовинизм ва империячиликни бузуқ мафкурага айлантирган Мединский ниҳоят рўйхатдалиги алоҳида эътиборли (патриарх Кирилл Гундяев бу сафар тушиб қолган). Яна коррупционерлар ёрдами билан босқинчиларни олимпия ўйинларига қайтараман, дея чучварани хом санаётган спорт вазири Дегтярев ҳам бор. Бундан ташқари Россия Марказий банки раис ўринбосарларидан Белов ҳам қора рўйхатга тушган.