​Божлар қонун билан белгиланади! Божхона божлари моҳиятан бу солиқ — солиқлар эса қонун билан, парламентда белгиланиши керак. Мана шу принциплар ниҳоят Ўзбекистонда ҳам жорий қилинадиган кўринади. Фармон билан тасдиқланган "Ўзбекистоннинг янги божхонаси — 2030" стратегиясига кўра, Ўзбекистон Республикасининг ЖСТга аъзо бўлгандан сўнг ягона ҳужжат тамойили остида товарларнинг ТИФ ТН бўйича кодлари, улар юзасидан ЖСТ доирасида келишилган максимал миқдорлар (bound rate) ҳамда амалиётда қўлланилаётган импорт божхона божи ставкалари Қонун билан белгиланиши вазифаси қўйилган. Ижро учун муддат — 2027 йил декабрь. Демак, эҳтимол, 2026 йилда, узоғи 2027 йилда ЖСТга аъзо бўлганимиздан кейин, бож ставкалари худди солиқ ставкалари каби парламентда маъқулланади ва бу жараён балки, биринчи марта 2028 йил бюджетини тасдиқлашда рўй беради. Парламентда бож ставкаларининг тасдиқланиши турли тор манфаатларни четга суриб, миллий иқтисодий манфаатларни устувор қилади ва барқарор, ишончли ва баҳолаш мумкин бўлган бож маъмурчилигига йўл очади.