Туман ва қишлоқларга кўчаётган эпидемия ҳақида Ўтган сафар июль ойининг аввалида вилоят ҳокимлари ва вазирлар кетма-кет коронавирусга чалиниб ё пневмония билан оғришни бошлагандан кейингина аҳвол жиддийлигини ҳис этишган ва тегишли қарорлар қабул қилиниб, чоралар қўллана бошлаганди. Ҳозир эпидемия ўчоғи пойтахт ё вилоят марказлари эмас, туманлар ва қишлоқлар бўлиб турипти. Жуда кўпчилик касалланганлар на ўзининг нима билан касалланганини ё яқинлари нима билан оғриётганини ҳам билаётганлари йўқ. Иситмалар, юрак ва нафас, қанд касали муаммолари ортидан ўлимлар кўпайган, лекин марҳумлар ва марҳум эгалари ўлим сабабини, на тест, на тиббиётга имкон бўлмагани сабабли коронавирус билан боғлашаётгани йўқ. Менталитет ҳам ўзгача. Тест топшириш учун вилоят марказига бориш керак аксар ҳолларда: бунга кўпчиликда на имкон ва на маблағ бор. Статистикани ёлғон ва ясалган маълумотларга тўлдирган билан, амалдорларнинг ишга чиқмаётгани ва даволанаётгани ҳаммасини ошкор қилмоқда. Ҳали кеч эмас, вазият ўта жиддийлашмасидан, туманларда тест олиш имкониятларини яратиш ва кўпайтириш, туманлар касалхоналарига зудлик билан ИВЛ ва кислород концентраторларини келтириш керак бўлади. Туман ва қишлоқларда сифатли алоқа ва интернет йўқ: даволанишнинг тасдиқланган протоколларини бошқа йўллар билан, масалан қоғозга чиқариб аҳолига тарқатиш лозим. Яна бир масала маросимларни вақтинча яна чеклаш билан боғлиқ - қишлоқларда тўйлар мавсуми ва уларни назорат қилишнинг ҳеч қандай имконияти мавжуд эмас. Бу борада қарор қабул қилишни реал мавжуд бўлмаган, амалда ҳеч ким сайламаган ва ҳокимларнинг югурдак шотирларидан иборат қанақадир туман кенгашларига масъулиятни қолдириб бўлмайди. @the_bakiroo