Пахта бойкоти самарасизлиги ҳақида Мен Cotton Campaign коалицияси доирасидаги ўзбек пахтасига бойкот самарадорлиги ва натижаларига заррача ишонмайман. Ўзбек пахтасига бойкот Ўзбекистонга нисбатан мамлакатни инсоний йўлга тушиши учун олиб борилаётган энг аҳмоқона кампаниялардан бири. Кампания зиён етказса, фақат ўзбек халқига, оддий ўзбекистонликларга, айниқса даромадсиз қатламларга зиён етказмоқда. Уларнинг турмуш даражаси пасаймоқда, қашшоқлик ортмоқда. Лекин бойкот кампанияси тўғридан-тўғри мажбурлашга оид айбдорларнинг адресатига етиб боргани йўқ. Мажбурий меҳнат билан боғлиқ чиновникларга жин ҳам ургани йўқ, улар мамлакатни талашда, эзғилашда ва бундан миллиардлаб манфаат топишда давом этмоқда. Шунинг учун Cotton Campaign агар ўзбекистонликларга дарҳақиқат эркинлик ва фаровонлик тиласа, пахта бойкоти бекор қилиниши лозим. Бунинг ўрнига Мажбурий меҳнатга алоқадор ўзбек чиновниклари рўйхати тузилиши ва бу рўйхатга тушган чиновник борки, уларнинг ва уларга аффилланганларнинг четдаги активлари, бизнес фаолиятлари тўхтатилиши, музлатилиши зарур. Бутун дунё, нормал дунё, қонунлар ишлайдиган дунё бўйлаб. Талтайган фарзанди Англияда ўқиёлмай қолган, танноз қизи Германия туғруқхонасида туғишига рухсат бўлмаган, хотини Францияда шоппинг қила олмайдиган, ўзи касал бўлса Швейцарияда даволана олмайдиган чиновник учун бундан ортиқ жазо йўқ. Активи ва ҳисобварақлари музлатилиши қанчалик уларга азоб беришини тасаввур этаверинг. @the_bakiroo