Хавотирли истиқболлар Франция ва Германия худди баҳорда бўлгани каби қатъий карантин чораларини тикламоқда. АҚШдаги келаси ҳафта бошида ўтадиган Президент сайловларида агар Трамп мағлуб бўлса, натижаларни тан олиш жараёни узоқ давом этадиган суд процессларигача етиб бориши мумкин. Нефть нархи яна пасайиш трендига қайтди ва психологик барьер - 40 долларлик чегарадан тушгач, қайта тиклана олмаяпти. Ривожланаётган мамлакатлар - Туркия, Мексика, Россия валюталари қадрсизланишда давом этмоқда. Халқаро молия институтлари ва экспертлар келаси йилга прогнозларини яна қайта кўриб чиқишни бошлади. Юз бераётган ва юз бериши мумкин бўлган воқеликлар таъсирида Макроиқтисодий ривожланишнинг хатарли сценарий прогнозлари асосийга айланиши эҳтимоли баландроқдек кўринади. Унга кўра, келаётган 2021 йилда ҳам иқтисодий ўсиш юз бермайди ёки турғунлик сақланади. Марказлашмаган инвестициялар, импорт ва экспорт қисқаришда давом этади. Фискаль дефицит 7,5%гача етади. Дарвоқе, Макроиқтисодий ривожланишнинг барча сценариялари ўрин олган Марказий банкнинг “Пул-кредит сиёсатининг 2021 йил ва 2022-2023 йиллар даврига мўлжалланган асосий йўналишлари” лойиҳаси билан батафсил танишишингиз ва мулоҳазаларингизни билдиришингиз мумкин.