Диёр Имомходжаев клуб ва вилоят номини келтирмай ёзмоқда: "Ажойиб формула бор, клубни технично хусусийлаштириб оласиз. Мухлислар бунинг тагига ҳеч қачон ета олмайди. Кейин эса ҳокимиятни отамиз, қандайдир машина заводини онамиз дейсиз. Барча учун вилоят футболини кўтариш йўлида ҳаракат қилаётгандек кўринасиз. Аслида эса сизнинг томорқангизга сувни вилоят ҳокимияти етказиб туриши, бошқа бир корхона эса экинларга чиқим қилиб туриши шарт. Ёнингизга овози баландроқ бир-икки мухлисни қўшиб олсангиз, улар сизни совут каби ҳимоя қилади. Оламга жар солаётганда вилоятимиз футболи деб гапиради, кимнингдир фирмаси деб эмас." Мен очиқ-ойдик айтишим мумкин, бу паразит клубнинг номи "Андижон" ФК, йиллар давомида вилоят ҳокимини орқа қилиб вилоят ташкилотлари қонини сўриш орқали мавжуд. Клуб бир неча, балки уларнинг сони бир неча ўнтадир паразитлашганларнинг манфаатларига хизмат қилади. Одатда, Ўзбекистон ичида Ўзавтомоторс билан муносабатга киришганлар қурбон ўрнида бўлади, лекин "Андижон" ФК мисолида Ўзавтомоторс қурбонлар қаторида. Яъни "Андижон" ФК йиллар давомида Ўзавтомоторсни беминнат соғиб, эмиб келади. "Андижон" ФК ва умуман ўзбек футболидаги паразитлашган клубларни номига хусусийлаштириб, тузатиб, эпақа қилиб бўлмайди. Чунки уларнинг мавжудлигининг ўзи иқтисодиётга қарши, табиат қонунларига қарши, жамият қонунларига қарши.