Самарасиз ва миллиардларни ўзлаштиришга асосланган энергетика ўзига қўшиб бутун иқтисодиётни ҳам хонавайрон қилиши ҳақида
Самарасизликда Венесуэланинг PDVSA компанияси билан мусобақалаша оладиган монополист Ўзбекнефтегаз етовидаги газчилар ўтган 9 ойда газ қазиб олишни 20%га, газ кондесатини 35%га қисқартирган.
Назаримда Ўзбекнефтегаз бу йил якуни бўйича тубдаги Венесуэланинг PDVSA компаниясини ҳам ортда қолдиради.
Гўёки ислоҳот кетаётганини кўрсатиш учун битта монополияни учта монополияга бўлиш билан чекланган Энергетика вазирлиги эса (Энергетика вазирлиги ва Ўзбекнефтегазни битта деб ҳисоблайверинг - эт ва суякдек чатишиб кетган) энди бизнесни ва бутун бошли тармоқларни газдан узмоқда.
Баҳона тайин - социал соҳа ва уй-жой фондига газ етказиш приоритетроқ экан. Буни ҳамма билади, газ ишлаб чиқаришни кўпайтир, миллиардларни ўзлаштиришни билган, газ қазишниям эплаши керак дейдиган мард йўқ на ҳукуматда ва на Парламентда. Бу 20 йилдан бери тизим ичида тизим яратган ва энди бир думалаб ўзини ислоҳотчи атаб вазирга айланган Султонов деганини қуйи палата ва Сенат чақирмайдими, сўроқ-савол қилмайдими? Йўқ, ҳамма жим-жит.
Эсингизда бўлса, йил боши кутилмаларида, Ўзбекистон энергоресурсларнинг нетто импортерига айланишини айтган эдик. Шу кунлар яқин. Энергетика соҳаси фақат пул ўзлаштиришда иборат тубсиз қора ўпқонга айланиб бўлган. Энергетикада йиллар давомида шаклланган самарасизлик ва ўғирликлар изсиз кетмайди. Тешикларни тарифларни тинимсиз ошириш ва халқ бўйнига илиш орқали ямаб келишган. Бир йил давомида тарифлар музлатилгани буларнинг ўғирликлари масштабини намоён қилди - қўйди.
Газ тақчиллиги ва узилишлар электр энергияси истеъмолига босим ўтказади, электр бизда асосан ИЭСларда, газ ёқиб ишлаб чиқарилади (хусусан ўғри олигархлар бир тийин тўламай эгаллаб олган ИЭСлар ҳам). Қарабсизки, ёпиқ ҳалқа: газ дефицит, истеъмолчилар электрга ўтади, электр ҳам газдан олинади. Табиийки электрниям катта хажмларда импорт қилишга ўтамиз.
Яна булар иқтисолиётни газдан узиб йил охиригача ЯИМни 1.5-2%гача оширишмоқчи, келаси йил эса планлар космос - ЯИМни 5,5%гача кўпайтириш мўлжалланган.
@the_bakiroo