Бангладешлик меҳнат мигрантлари ҳақида Uzbekistan GTL ва ENTER Engineering томонидан Қаршига келтирилган 239 бангладешлик масаласини ёпилди, деб ҳисобламаслик керак. Гарчи Ташқи меҳнат миграция агентлиги тасдиқнома учун рухсатнома берганимиз йўқ, деб қасам ичаётган бўлса ҳам. Амалдаги қоидаларга кўра хорижлик фуқаро ёки фуқаролар аввал Ўзбекистон ҳудудига келади ва кейингина иш берувчи улар учун Ўзбекистонда меҳнат фаолиятини амалга ошириш ҳуқуқи учун буюртма беради. Нима бўлган тақдирда ҳам 239 бангладешлик Ўзбекистонда ва буни минг қасам ичиб ҳам рад этиб бўлмайди. Улар аниқ ишлатиш мақсадида олиб келинган. Бундай тадбир 1-2 кунда амалга оширилмайди, бунга ойлар вақт кетади. Барча процедуралар инобатга олинса, Uzbekistan GTL ва ENTER Engineering бангладешликларни олиб келишни камида ёз ойларида режалаштирган. Олдинда иккита йўл бор: Биринчиси - Ўзбекистонга келиб улгурган бангладешликлар қайтариб юборилади, қолгани эса келтирилмайди Албатта уларни келтириш бўйича битимни бузганлик учун Uzbekistan GTL ва ENTER Engineering молиявий харажатларни ўз зиммасига олади. Иккинчиси - Ўзбекистонга келиб улгурган бангладешликларга меҳнат фаолиятини амалга ошириш ҳуқуқини берувчи тасдиқнома берилади. Қолган партиядаги мигрантларнинг келиши вақтинча тўхтаб туради. Uzbekistan GTL ва ENTER Engineering, Энергетика вазирлиги манфаатлари чатишиб-битишиб кетгани, уларнинг лоббиси қарор қабул қилишда ўта кучлилиги ва жамоатчилик фикрига тупуриб қўйилгани инобатга олинса, иккинчи вариант эҳтимоли юқорироқ. Фикри ожизимча. Бангладешлик мигрантлар кейси ҳозирги макон ва замонимизда мамлакатимизга сотиладиган, сўриб олинадиган, четга ташиб кетиладиган ресурс манбаи ёки шунчаки даромад яратадиган фабрика сифатида оккупантлардек қараш одатий ҳолга айланаётганини яна бир бор намоён этади. P.S. Энг қизиғи нима биласизларми, шу бангладешликларни қоракўз ўзбекистонликлар ўрнига ишлатишга олиб келган силлиқлар бизга ва сизга ватанни севишни, тинимсиз мадҳия куйлашни, танаффус пайтида қўшиқ айтишни ўргатишмоқда. @the_bakiroo