Ички ишлар ходимлари маоши оширилиши керак ва... Фарғонадаги учрашувларда Ички ишлар ходимларининг маоши оширилиш ҳақида айтиб ўтилган. Албатта, бу ишни қўллаб қувватлаш лозим. Фақат соҳада меҳнат унумдорлиги ва шахсий таркиб сифат даражасини каррасига ошириш лозимлигини инобатга олган ҳолда. Масалан, Ички ишлар ходимларининг маоши 50%га ошириш уларнинг сонини камида икки баробар қисқартириш орқали амалга ошириши зарур. Бизга сон саноқсиз, ҳар қадамда турадиган назоратчи ва қўриқчилар эмас, сифатли, ихчам, ҳаракатчан ва энг асосийси Қонунни биладиган ва ҳурмат қиладиган полиция керак. Очиқлик ҳақида тўрт йилдан буён гапирилаётган бўлсада, ҳалигача жамоатчилик Ички ишлар ходимлари сонини, уларга сарфланаётган харажатлар миқдорини билмайди. Фақат кузатувлар ва кўриб турганимиз ўзгаришлардан сезаётганимиз билдириш мумкин: Каримов замонида ҳар қадамда иккитадан ички ишлар ходимларини кўрган бўлсак, ҳозирга замонда ҳар қадамда иккитадан ички ишлар ходимлари, лекин уларнинг ёнида яна иккитадан Миллий гвардия ходимлари ҳам қўшилиб олган. Биз, ҳозирги иқтисодий аҳволимиз кучишлатарлар билан боғлиқ шунча юклама ва харажатни ўзида кўтара оладими? Бу харажатлар самаралими? Ҳеч ким шу саволни бераётгани йўқ. Албатта, ички ишлар ходимлари, айниқса маҳалла нозирлари уларнинг функционал вазифасига кирмайдиган тутуруқсиз ва самарасиз топшириқлардан, турли ҳисобот ва қоғозбозликлардан озод қилиниши керак. Шу билан бирга жиноятчилик статистикасига кўра ички ишлар ходими фаолиятига баҳо бериш бу ўта кетган телбаликдир. Жиноятчилик кўламини хаспўшлаш, мавжуд вазиятни яхшилаб кўрсатишга уринишдан ва сохтакорликдан бошқа нарса эмас. Кейин, ичик ишлар ходимларини нормал ном билан атайлик, барака топгурлар. Илгари милиция, мелиса деб атардик. Ҳозир бу ном расман ишлатилмайди. Келинглар, велосипед кашф этмай, бутун нормал дунё қилган ишни қилайлик. ички ишлар ходими эмас, полиция деган атамани қабул қилайлик. Фуқароларимиз полицияни кўрганда хавф кўргандек қочиши эмас, унинг ҳуқуқини ҳимоячиси тургандек фахрланиши лозим. Ўзбек полициясининг қиёфаси ва мазмуни шундай ўзгариши лозимки, ёш болалар мелисага бервориш билан қўрқитилмаслиги керак. @the_bankiroff