Туя эмаслигингни исботла! Шу кунларда ижтимоий тармоқлар ва бухгалтерларнинг телеграм гуруҳлари дод-войларга тўлиб кетган. Ҳозирча айюҳаннослар овози ОАВларгача ва кенг жамоатчилик кун тартибигача етиб боргани йўқ. Лекин барибир етиб боради. Чунки емаган сомсаси учун пул тўлаган, аниқроғи муттаҳам деб топилган тадбиркорлар учун солиқ ундирилган тадбиркор ўша тўловининг қийматини товари ёки хизмати устига қўйиб албатта чиқариб олади. Бунинг юки ҳаммамизнинг бўйнимизга тушади. Шу ўринда ўтказилаётган солиқ развёрсткаси ҳақида айрим мулоҳазалар: Биринчидан, нега янги даврда "обналчилар" йўқ бўлиб кетмади? Аввал қандай ишлашган бўлса, ундан ҳам бешбадтар безбетлик билан ишлашда, "ишини қилиб", "соққасини ишлаб олгач" ҳеч бир муаммосиз ёпилиб кетишмоқда. Уларни олдин ким "крышевать" қилиб келган бўлса, ўшалар ҳалиям улар учун валийнеъмат. Узундан-узун номга эга департаментга уларнинг шубҳали операциялари ҳақида маълумот берганликдан заррача наф йўқ. Қачон обналчиларни тутиши керак бўлганлар улар билан ҳамкорликдан соққа ишлашни тўхтатишади? Иккинчидан, нега "недобросовестный" солиқ тўловчилар ўз вақтида реестрдан олиб ташланмайди? Нега бунинг жаврини ҳалол тадбиркорлар тортиши керак? Нега Солиқ идоралари ўзининг тўғридан-тўғри оператив вазифасини қолган тадбиркорларга юклайди? Нега солиқ идоралари лозим даражада ўз вазифасини бажармагани тўловини тадбиркорлар, демакки, қолган барча солиқ тўловчилар тортиши керак? Учинчидан, нега "солиқ развёрсткаси" айнан ҳозир ўтказилмоқда? Тўғри, олтин нархлари ўтган йилдагидек шиддат билан ўсиб бораётгани ва ўпқонга айланган бюджет тешикларини ўтган йилдагидек тўлдиришнинг имкони йўқ. Вазифа ҳар қандай йўл билан ва бу қанчага тушишдан қатъий назар бюджетни тўлдиришми? Оқибатлар бундан ҳам бадтар бўладику. Бунақа развёрсткадан кейин солиқ тушумлари яна пасайса пасаядики, асло ортмайди, эртага гайка янада қотирилиб, солиқ террори бошланадими? Аксар тадбиркорлар ҳақдор бўлса-да, солиқчилар билан тортишиб, ҳақини талаб қилиб ўтирмайди, уларнинг реакцияси ўзгача бўлади. Бу ҳақда Асланов луқма қистириб ўтиб кетгани бежиз эмас. Тўртинчидан, ўтказилаётган солиқ развёрсткаси пастдан чиққан ва тепага ёқиш учун ташаббусми ёки тепанинг махсус топшириғи? Мақсад нима ўзи? Сон-саноқсиз мелисаларнинг ойлигини 60%га оширишга ёки олчоқ ҳокимларнинг бюджетни ошириб бажариш ва ошган қисмини ўзлаштириб чайиш учун пул топишми? @the_bankiroff