Стерилизация ҳажмининг ойлик кўрсаткичлари очиқланди Марказий банк монетар олтин сотиб олишдан пайдо бўлган ортиқча ликвидлиликнинг стерилизация ҳажмини ой якунлари бўйича маълум қилишни бошлади. Хусусан, 2021 йил февралда 4,1 трлн.сўмлик маблағлар стерилизация қилиб олинган. Яъни, Марказий банк томонидан 390 миллион АҚШ доллари атрофидаги валюта сотилган. Сал аввалроқ 1 февраль ҳолатига кенг маънодаги пул массасининг, хусусан М0+М1 агрегатлари қолдиғининг кескин камайгани маълум бўлганди. Февраль ойида регулятор томонидан қанча олтин сотиб олингани очиқланмаган. Маълумот учун, 2020 йил август ойидан буён Ўзбекистон олтин экспорт қилаётгани йўқ. Февраль ойида қиймати барқарор сақланган сўмнинг қийматига аҳолининг қарорлари ҳам сезиларли таъсир ўтказган кўринади. Регуляторга кўра, ўтган ойда аҳоли тижорат банкларидан сотиб олганидан кўра, 220 миллион доллар кўпроқ валюта сотган.