Кадастр ҳужжатларини расмийлаштириш прейскурант нархлари 3,5 йил аввалги ҳолатига қайтарилди Ҳукумат қарорига киритилган ўзгартиришлар билан кўчмас мулк объектларининг кадастр ҳужжатларини тайёрлаш ва расмийлаштириш билан боғлиқ давлат хизматлари нархлари 25%га арзонлаштирилгани айтилмоқда. Аслида эса бундан 3,5 йил аввал давлат хизматлари учун қўшимча олинган 25 фоизлик ортиқча тўлов бекор қилинмоқда. Яъни, амалда нархлар арзонлашмади, аввалги прейскурантга қайтарилди. Ўшанда Ҳукумат қарорига кўра, ҳар бир бирлик кадастр хизматлари учун қўшимча 25%лик тўлов киритилиб, бу тўловлардан тушадиган маблағлар Ер муносабатлари ва давлат кадастрини ривожлантириш жамғармасига ўтказилиши белгиланган эди. Эсингизда бўлса ўша даврда ҳар бир вазирлик ва қўмита ўзи учун чўнтак жамғармалар ташкил этиш роса урф бўлган эди.